ಚಿತ್ತಾಪುರ: ಕನ್ನಡ ಚಿತ್ರರಂಗದ ದೃಢ ಸಂಕಲ್ಪದ ಪ್ರತಿಭೆ, 'ಆಟೋರಾಜ' ಎಂದೇ ಕನ್ನಡಿಗರ ಹೃದಯದಲ್ಲಿ ಅಮರರಾಗಿರುವ ಅಭಿನಯ ಶಾರದೆ ಶಂಕರ್ ನಾಗ್ ಅವರ 36ನೇ ಪುಣ್ಯಸ್ಮರಣೆಯನ್ನು ಪಟ್ಟಣದ ಪ್ರಮುಖ ಆಟೋ ಸ್ಟ್ಯಾಂಡ್‌ನಲ್ಲಿ ಶಂಕರನಾಗ್ ಅಭಿಮಾನಿ ಬಳಗ ಹಾಗೂ ಆಟೋ ಚಾಲಕರ ಸಂಘದ ಸಂಯುಕ್ತಾಶ್ರಯದಲ್ಲಿ ಅತ್ಯಂತ ಶ್ರದ್ಧಾ-ಭಕ್ತಿಯಿಂದ ಆಚರಿಸಲಾಯಿತು.
ಕಾರ್ಯಕ್ರಮದ ಆರಂಭದಲ್ಲಿ ಶಂಕರ್ ನಾಗ್ ಅವರ ಭಾವಚಿತ್ರಕ್ಕೆ ವಿಶೇಷ ಪೂಜೆ ಸಲ್ಲಿಸಿ, ಮೇಣದಬತ್ತಿ ಬೆಳಗಿ, ಪುಷ್ಪನಮನ ಸಲ್ಲಿಸುವ ಮೂಲಕ ಅಭಿಮಾನಿಗಳು ಮತ್ತು ಆಟೋ ಚಾಲಕರು ತಮ್ಮ ನೆಚ್ಚಿನ ನಟನಿಗೆ ಭಾವಪೂರ್ಣ ಶ್ರದ್ಧಾಂಜಲಿ ಅರ್ಪಿಸಿದರು.
ಕಾರ್ಯಕ್ರಮವನ್ನುದ್ದೇಶಿಸಿ ಮಾತನಾಡಿದ ಶಂಕರನಾಗ್ ಅಭಿಮಾನಿ ಬಳಗದ ಅಧ್ಯಕ್ಷ ನಾಗೇಶ್ ಕಾಶಿ, "ಕನ್ನಡ ಚಿತ್ರರಂಗದಲ್ಲಿ ಕೇವಲ ನಟರಾಗಿ ಮಾತ್ರವಲ್ಲದೆ ನಿರ್ದೇಶಕ, ನಿರ್ಮಾಪಕ ಹಾಗೂ ಸಮಾಜದ ಬಗ್ಗೆ ಹೊಸ ಕನಸುಗಳನ್ನು ಕಂಡ ಅದ್ಭುತ ದೂರದೃಷ್ಟಿಯ ವ್ಯಕ್ತಿಯಾಗಿ ಶಂಕರ್ ನಾಗ್ ಅವರು ತಮ್ಮದೇ ಛಾಪು ಮೂಡಿಸಿದ್ದರು. ಅವರು ಜೀವಿಸಿದ್ದು ಕೇವಲ 35 ವರ್ಷಗಳ ಸಣ್ಣ ಅವಧಿ. ಆದರೆ ಆ ಅಲ್ಪಾವಧಿಯಲ್ಲೇ ಕನ್ನಡ ಚಿತ್ರರಂಗಕ್ಕೆ ಹಾಗೂ ರಂಗಭೂಮಿಗೆ ನೀಡಿದ ಕೊಡುಗೆ ಅಪಾರವಾದದ್ದು" ಎಂದರು.
ಸಂಘದ ಅಧ್ಯಕ್ಷ ಲಕ್ಷ್ಮಿಕಾಂತ್ ತಾಂಡೂರಕರ್ ಮಾತನಾಡಿ, "ಇಂದು ಶಂಕರಣ್ಣ ನಮ್ಮ ನಡುವೆ ದೈಹಿಕವಾಗಿ ಇಲ್ಲದಿರಬಹುದು. ಆದರೆ ಅವರ ಪ್ರಗತಿಪರ ಆಲೋಚನೆಗಳು, ಸಾರ್ವಕಾಲಿಕ ಸಿನಿಮಾಗಳು ಹಾಗೂ ನಾಡಿನ ಅಭಿವೃದ್ಧಿಯ ಕನಸುಗಳು ಇಂದಿಗೂ ಪ್ರತಿಯೊಬ್ಬ ಕನ್ನಡಿಗನ ಮನಸ್ಸಿನಲ್ಲಿ ಜೀವಂತವಾಗಿವೆ" ಎಂದು ನೆನೆದರು.
ಶಂಕರ್ ನಾಗ್ ಅವರು 'ಆಟೋರಾಜ' ಚಿತ್ರದ ಮೂಲಕ ಪ್ರತಿಯೊಬ್ಬ ಆಟೋ ಚಾಲಕನಿಗೆ ವೃತ್ತಿ ಗೌರವ ಮತ್ತು ಗೌರವದ ಸ್ಥಾನಮಾನ ತಂದುಕೊಟ್ಟರು. ಕೇವಲ ಬೆಳ್ಳಿಪರದೆಯಷ್ಟೇ ಅಲ್ಲದೆ, 'ಮಾಲ್ಗುಡಿ ಡೇಸ್' ನಂತಹ ವಿಶ್ವದರ್ಜೆಯ ಧಾರಾವಾಹಿಯ ಮೂಲಕ ತಮ್ಮ ಅದ್ಭುತ ಸೃಜನಶೀಲತೆಯನ್ನು ಜಗತ್ತಿಗೆ ತೋರಿಸಿಕೊಟ್ಟರು. ಅಂದಿನ ಕಾಲದಲ್ಲೇ ಬೆಂಗಳೂರಿಗೆ ಮೆಟ್ರೋ ರೈಲು ಯೋಜನೆ, ನಂದಿ ಹಿಲ್ಸ್ ರೋಪ್‌ವೇ ಮತ್ತು ಸಂಚಾರ ವ್ಯವಸ್ಥೆಯ ಸುಧಾರಣೆಗಳ ಬಗ್ಗೆ ಚಿಂತಿಸಿದ್ದ ಅವರು, ನಿಜವಾದ ಅರ್ಥದಲ್ಲಿ ಭವಿಷ್ಯದ ಕರ್ನಾಟಕ ಹೇಗಿರಬೇಕು ಎಂಬ ಕನಸು ಕಂಡಿದ್ದ 'ನವ ಕರ್ನಾಟಕದ ಶಿಲ್ಪಿ' ಎಂದು ಉಪಸ್ಥಿತರಿದ್ದವರು ಬಣ್ಣಿಸಿದರು.
ಮುಖ್ಯ ಅತಿಥಿಯಾಗಿ ಆಗಮಿಸಿದ್ದ ಶಂಕರನಾಗ್ ಅಭಿಮಾನಿ ಸುರೇಶ್ ಬೆನಕನಳ್ಳಿ ಮಾತನಾಡಿ, "ಶಂಕರ್ ನಾಗ್ ಅವರನ್ನು ವರ್ಷಕ್ಕೊಮ್ಮೆ ನೆನಪಿಸಿಕೊಂಡರೆ ಸಾಲದು. ಅವರು ತಮ್ಮ ವೃತ್ತಿಯನ್ನು ಎಷ್ಟರಮಟ್ಟಿಗೆ ಪ್ರೀತಿಸುತ್ತಿದ್ದರೋ ಅದೇ ರೀತಿ ಆಟೋ ಚಾಲಕರು ತಮ್ಮ ವಾಹನಗಳನ್ನು ಪೂಜಿಸಬೇಕು. ಪ್ರತಿಯೊಂದು ಆಟೋ ಮೇಲೆಯೂ ಶಂಕರನಾಗ್ ಅವರ ಭಾವಚಿತ್ರ ಇರಬೇಕು" ಎಂದರು. ಮುಂದುವರಿದು, "ಗರ್ಭಿಣಿಯರಿಗೆ, ವೃದ್ಧರಿಗೆ ಹಾಗೂ ತುರ್ತು ಸಂದರ್ಭದಲ್ಲಿ ಉಚಿತ ಸೇವೆ ನೀಡುವುದು, ಪ್ರಯಾಣಿಕರಿಂದ ಹೆಚ್ಚಿನ ಬಾಡಿಗೆ ವಸೂಲಿ ಮಾಡದೆ ಪ್ರಾಮಾಣಿಕವಾಗಿ ನಡೆದುಕೊಳ್ಳುವುದು ಶಂಕರಣ್ಣನಿಗೆ ನಾವು ಸಲ್ಲಿಸುವ ನಿಜವಾದ ಗೌರವ. ಮುಂಬರುವ ದಿನಗಳಲ್ಲಿ ಇನ್ನಷ್ಟು ಒಗ್ಗಟ್ಟಿನಿಂದ ಶಂಕರ್ ನಾಗ್ ಅವರ ಜಯಂತಿ ಮತ್ತು ಪುಣ್ಯಸ್ಮರಣೆಯನ್ನು ಸಮಾಜಮುಖಿ ಕಾರ್ಯಕ್ರಮಗಳ ಮೂಲಕ ಅದ್ದೂರಿಯಾಗಿ ಆಚರಿಸೋಣ" ಎಂದು ಕರೆ ನೀಡಿದರು.
ಈ ಸಂದರ್ಭದಲ್ಲಿ ಪ್ರಮುಖರಾದ ಸಿದ್ದಪ್ಪ ಗಾಂಧಿ, ಮುನಿಯಪ್ಪ ಬಾಗೋಡಿ, ವಿಠ್ಠಲ್ ಕಟ್ಟಿಮನಿ, ಯಲ್ಲಪ್ಪ ಕಾಶಿ, ಅಂಬರೀಶ್ ಭೋವಿ, ರಾಜು ಕಾಶಿ, ಸುಭಾಷ್ ಕಾಶಿ, ದೇವು ಕೊನೇಮನಿ, ಭಾರತ್ ಕಾಶಿ, ಸುನಿಲ್ ಮೋಗಲಿ, ರಾಜು ಭಜಂತ್ರಿ, ಅಂಬು ಭೋವಿ, ಶ್ರೀಶೈಲ್, ಬಾಬ್ರೂ ಕಾಶಿ, ಸಂತೋಷ್ ಪೂಜಾರಿ, ರಮೇಶ್ ಕಾಳೂರು, ಸುಭಾಷ್ ಗುತ್ತೇದಾರ್, ಸುನಿಲ್ ಕಾಶಿ ಸೇರಿದಂತೆ ಪಟ್ಟಣದ ನೂರಾರು ಅಭಿಮಾನಿಗಳು ಹಾಗೂ ಆಟೋ ಚಾಲಕರು ಉಪಸ್ಥಿತರಿದ್ದರು.