ಕಲಬುರಗಿ: ಶ್ರಾವಣ ಮಾಸವು ಕೇವಲ ಧಾರ್ಮಿಕ ಆಚರಣೆಗಳಿಗೆ ಸೀಮಿತವಾಗದೆ, ಆಳವಾದ ಆಧ್ಯಾತ್ಮಿಕ ಹಾಗೂ ಪಾರಮಾರ್ಥಿಕ ತತ್ವವನ್ನು ಒಳಗೊಂಡಿದೆ ಎಂದು ಶ್ರೀ ವೇ. ಮೂ. ಸೂಗೂರೇಶ್ವರ ಸ್ವಾಮಿ ಹಿರೇಮಠ ತಿಳಿಸಿದ್ದಾರೆ.
‘ಶ್ರಾವಣ’ ಎಂಬ ಪದವೇ ‘ಶ್ರವಣ’ (ಕೇಳುವುದು) ಎಂಬುದನ್ನು ಸೂಚಿಸುತ್ತದೆ. ಸತ್ಯವನ್ನು ಆಲಿಸುವುದು, ಗುರುಮುಖದಿಂದ ಜ್ಞಾನ ಪಡೆಯುವುದು ಹಾಗೂ ಅದನ್ನು ಮನನ ಮತ್ತು ನಿಧಿಧ್ಯಾಸನದ ಮೂಲಕ ಆತ್ಮಸಾಕ್ಷಾತ್ಕಾರವಾಗಿ ಪರಿವರ್ತಿಸಿಕೊಳ್ಳುವುದೇ ಶ್ರಾವಣದ ನಿಜವಾದ ಅರ್ಥವಾಗಿದೆ.
"ಜಲಬಿಂದು ಸಾಗರದಲ್ಲಿ ಲೀನವಾಗುವಂತೆ, ಜೀವನು ಪರಬ್ರಹ್ಮನಲ್ಲಿ ಲೀನವಾಗುವುದೇ ಆಧ್ಯಾತ್ಮದ ಅಂತಿಮ ಗುರಿ. ಭಕ್ತಿ ಮತ್ತು ಜ್ಞಾನವನ್ನು ಸಮನ್ವಯಗೊಳಿಸಿ ಆತ್ಮಜ್ಞಾನ ಪಡೆಯಲು ಈ ಮಾಸ ಸೂಕ್ತ."
— ಶ್ರೀ ವೇ. ಮೂ. ಸೂಗೂರೇಶ್ವರ ಸ್ವಾಮಿಗಳು, ಗುಬ್ಬಿ ಕಾಲೋನಿ, ಕಲಬುರಗಿ.
ಶ್ರವಣದಿಂದ ಬುದ್ಧಿ ಶುದ್ಧವಾಗಿ ‘ನಾನು’ ಎಂಬ ಅಹಂಭಾವ ಅಳಿಯುತ್ತದೆ. ಕೇವಲ ಬಾಹ್ಯ ಆಚರಣೆಗಳಿಗಿಂತ ಮನಸ್ಸಿನ ಶುದ್ಧೀಕರಣ ಹಾಗೂ ತತ್ವಚಿಂತನೆಗೆ ಶ್ರಾವಣ ಮಾಸವನ್ನು ಬಳಸಿಕೊಂಡು ಪ್ರತಿಯೊಬ್ಬರೂ ಜೀವನವನ್ನು ಸಾರ್ಥಕಗೊಳಿಸಿಕೊಳ್ಳಬೇಕು ಎಂದು ಸ್ವಾಮೀಜಿ ಕರೆ ನೀಡಿದ್ದಾರೆ.